2019 台中三井outlet mall

最近係各大旅遊雜誌都有講呢個台中港新開既三井outlet，咁2019年2月就有個星期要飛去台中同美洲黎既義工上級開會🤪就要早飛1日，於是決定一落機就去呢個outlet到行下，點知…係中伏的開始…😱

本身諗住一落機到埗就搭公車去呢個outlet (因為台中搭公車用悠遊卡或者一卡通頭10公里係唔駛俾錢，加上本人呢3年黎有4次遇上台中黑的既黑歷史)，上機個陣遇到2個auntie，咁佢地唔係成日去台中，佢地一聽到我話去outlet於是就跟我隊了。等行李個陣諗住睇定有咩公車去，咁就不停google map search下幾遠，有咩車到，點知第一伏位出現了…個google map話我知，個outlet mall位於台中港 (台中的海邊貨櫃碼頭、漁港、外島碼頭既地方)，距離位於清水區清泉崗既台中機場，相距10km，要搭公車要先搭238再行19分鐘，全程免費。不過我有個背囊同個喼，再加2個auntie (加多2個喼)，邊到行到咁遠呀…所以焗住搭小黃…全程搭左NTD390 (大約HKD106) ，跳錶應該ok啦。

到左outlet，個look好似美國outlet咁大，仲有個好大的海邊摩天輪😮但係第一件事唔係行街shopping，而係搵locker放低個3個喼先。

全個outlet有4個點有locker，不過地方太大，一定要記好自己個locker位置。而locker size有細、大同手機充電箱三個size 既箱，細箱就NTD40/3hrs (大約HKD11)，大箱就NTD60/3hrs (大約HKD16.2)，手機充電箱就NTD30/3hrs (大約HKD8.1)。其實一個大箱真係可以塞到我地3個人個3個細喼，剛剛好，所以NTD60/3hrs就真係抵玩既。而手機充電箱就值得一讚既，行行下，發現無帶充電器或者個充電器無電可以一充的。至於個locker密碼係可以自己set，仲可以揀有要唔要print返張密碼紙俾自己寄低。

終於可以逐間舖頭望睇下有無咩啱買有咩折咁，啲牌子係大牌子，香港都有見過，入去睇下價錢啦。嘩！原來個價錢同香港差唔多價，仲要寫住已經折左，有啲牌子仲離譜到折完仲貴過係香港買！！(下，咁我做咩搭飛機黎台中，仲要轉車成個鐘入黎買？！)原來台灣入口稅係好高，比香港高好多！所以outlet訂個所謂折左既價係俾本地人買，對遊客黎講真係無咩著數。唯一優點係outlet既餐廳同food court大部分都係由日本引入，係台灣就可以食到日本先有既餐廳，但價錢方面我就唔識比較，因為近年都無去過日本。我地就入左J. S. Foodies Tokyo 食佢地最出名既梳芙里pancake，同各人叫左杯野飲，我就叫左杯烏龍Latte，食物質素係ok的，埋單都要NTD5XX。

總結黎講，成個outlet吸引唔到我呢個遊客，下次未必會再去。但如果你只係想舒舒服服食個飯，呢到都ok既。

<outlet網址:https://www.mop.com.tw/taichungport/tw/index.html>

#2019 #taiwan #taichung #台灣 #台中 #三井outlet #outlet