南北韓邊界- JSA與DMZ38遊記<臨津閣公園>
- Scarla Scarlet
- Oct 25, 2018
- 2 min read
遊完JSA我地全團人要搭返軍巴出返去外圍轉返旅行社旅遊巴去臨津閣公園了。
到站落車竟然見到一個無咩人但係有開門得1、2個職員既機動遊樂場，洗手間亦係裏面，我估應該係俾住係邊境村村民消遣的。
終於到了午飯時間了！
呢個kkday團包埋午餐-傳統韓式牛肉湯飯一客，咁入去JSA之前導遊已經問定我地食咩方便食店可以整定等我地去到就可以食。個飯我無影到相，因為得1.5小時食+遊覽，坐我隔離的台灣Vlogger[吉峰]反而拍片拍埋我個份，到時候可以睇返。😆
食完就捉緊時間遊覽。 上左臨津閣遊客中心瞭望台一睹南北韓邊界的寧靜森林，如果南北韓永遠保持呢種和平就夠了。
遊客中心附近有望拜壇，但望拜壇翻新中，工人要趕係中秋節(韓國人叫秋夕)之前完工，可以俾脫北者或者有祖先留左係北韓既人遙望北韓家鄉拜祭先人，況且望拜壇塊碑等於佢地先人既牌位，我就尊重先人所以無影到。<註: 韓國人跟華人習俗不同，華人多數會係清明、盂蘭節、重陽、生死忌祭祖，但韓國人會係秋夕、過舊曆新年祭祖，而且會整好多祭品啊！>
望拜壇隔離有一個望鄉歌碑，雕刻著南北韓分隔時有好多家庭分離既雕像，有隻望鄉歌播返出來，但聽完真係好心酸.... 諗起大陸同台灣雖不同政權，但而家都可以申請通行証見到分離的家人，但南北韓的分開左就可能一生都見唔到，或者有命等到有日兩國首領放寬先可以有機會見到一面....
之後到左臨津閣公園，山坡下有一個小水池同涼亭，景色優美，簡直係邊界可以忘記時間的世外桃源，但無遊客敢行落黎，只敢係上面影落黎？！所以得我一個人，正！
係公園望返上去會見到自由之橋，1953年南北韓就係呢條橋上移交戰俘，相信老一輩韓國人應該會印象好深。
再由自由之橋望出去，眺望到京義線，但京義線北面總站而家去到都羅山站，都羅山站再北上就唔得了，因為北韓封左暫時未開通北韓路段，所以無咩火車會上。
再走回頭路，鐵絲網外掛住好多南韓人祈願統一同和平的絲帶，有啲專登黎睇自己偶像掛的絲帶，但我無韓星偶像🤓，有間手信店有得買絲帶寫祈願。
鐵絲網隔離有架滿佈當年韓戰子彈孔的生銹火車頭，放係到係警醒後人要記住戰爭之苦及分離之痛。
臨津閣遊覽完了，要去下一站了-第三隧道。
Comments