南北韓邊界- JSA與DMZ38遊記<前傳>

2017年，南北韓關係跌到一個冰點，冰到南韓加強戒備，漢江上空都有空軍直升機不停巡邏，所以2017年想去南北韓邊界都無得去。 2018年，南北韓關係緩和到一個前所未見既頂點，更係JSA共同警備區撤出軍備。 究竟肥仔恩係一個政治奇葩，定係同侵侵一齊上演打者愛也政治鬧劇，就不得而知了。 我見關係好左咁多，於是上kkday參加南北韓邊境一日遊。

介紹下咩係DMZ38同JSA。 當年大韓民國因爲二戰後唔再受日本統治，可以正式有自主權，於是有兩派人分裂為一派支持由美國做背後支援國，信奉資本主義，另一派支持由蘇聯做背後支持國，信奉共產主義。於是兩派人各自擁有軍隊，結果淪為自相殘殺。當年由金日成帶領共產主義軍隊本來可以一舉打到落釜山附近，點知一個民國軍黎個鯉魚翻身打返上北韓，雙方對峙，結果努動到國際社會出手，介定北緯38度附近一帶雙方各退後2公里為兩韓停戰區及分界線，名為DMZ38，即係肥仔恩同文在寅手拖手跨過個條界。 至於JSA就係兩韓共同軍備警戒區，三八線以北歸北韓管理，以南歸南韓管理。當中雙方可以係板門店起幾間小屋作為軍事停戰開會之用，用顏色區分，藍色為南韓範圍，白色為北韓範圍。

不過要參觀JSA係有N咁多限制的。 日子係佢地聯合國軍隊定，者係如果太凍或者軍方認為有危險係會封區，除左軍人同係邊境區住既村民外，其餘一律唔俾入，仲要交護照副本keep record。 衣著要平實唔可以太浮誇、暴露及帶有政治意識，者係背心短褲涼鞋全部唔得，有國旗粗口辱罵肥仔恩唔得。

仲要入去之前放低所有隨身物品包括袋、銀包、護照等係旅行社既旅遊巴到，只可帶電話、平板電腦、相機和太陽眼鏡上由聯合國軍隊既旅遊巴再入JSA地帶。如果不幸地，參觀個日落雨，係絕對唔可以帶遮，只可以帶雨褸或者淋雨。再不幸地大雨到gg，軍方係會取消行程。 當然只可以影相，唔可以拍片同錄音。不過就有影相規矩要跟從，唔可以違反。 人數方面，據帶隊導遊講，一日只可以一間認可旅行社帶限定人數入去包括導遊，所以係有人因人數限制而被取消。

最後，要帶住聯合國軍隊發出既訪客証，無左或者唔見左都好麻煩。

寫左一大輪，點解要咁多規定咁麻煩？帶隊導遊話，因為北韓政府咩都可以找麻煩，所以南韓政府唔想挑起紛爭，決定訂立一大串規矩，要班遊客去遷就。 坐左一個鐘車程，去到邊防閘口check passport，落旅遊巴轉聯合國軍隊旅遊巴，再坐半個鐘，終於到JSA旅客中心。不過仲要聽聯合國軍隊代表聽簡介會同簽一份聲明-JSA板門店生死狀，全英文，唔簽無得入去板門店，所以限時3分鐘，簽左，跟住就好似小學雞咁排隊，終。於。入到去了。😆😆😆😆

#2018 #korea #northkorea #jsa #dmz38 #kkday #travelalonehkg #travel #travelalone #localtour