媽宮。北環。台灣好行 2

出發

今天天氣很熱，好彩有買到由台灣政府推出既台灣好行，啱哂我呢D極級懶人，一張飛可以去N個景點，唔駛自己諗，又有冷氣車坐，又可以玩足一日，正👍🏻

上左車之後，咁我就問上回講到個位老外同靚女係邊到黎，叫咩名咁啦。 老外叫Ben，美國人，去過香港讀書，而家就係台灣讀中文，識講國語，不過我有時會同佢英文😂，間唔中會同佢講國語（好似同老細溝通咁）。

靚女就係台灣嘉義人，叫Lulu，同老外Ben一早就識。 由於買左3份蛋餅🙈，佢地又未食早餐，我就同佢地分享我份超級大早餐了😂😂

架車終於起行，首先去石滬廣場、第三漁港同馬公機場接其他人，之前個2個站都無人上車，終於去到機場接到一家人，都係由台灣本島黎的，者係話除左我同老外，其餘都係台灣人😳

接哂人就向我地既第一站<跨海大橋>出發啦！架車實在太舒服啦，風景又優美，大家都唔出聲，嘆住冷氣同欣賞美景。

去白沙鄉既途中，經過中屯風車，真係同海邊好夾😍

跨海大橋

終於都到第一站<跨海大橋>，真係好多人，傳統旅遊景點。大橋連接白沙島同西嶼島既大橋，亦係台灣最長既橋，方便左好多澎湖本島既人。

仙人掌冰

係跨海大橋附近有間賣仙人掌冰既小店，當地盛產仙人掌同風茹，所以呢2樣野會老是常出現係澎湖。不過一場黎到，無理由唔試仙人掌冰架，咁買左杯黎食下，甜甜地，又ok喎😋

之後我地又係附近影下相😄天氣實在太好，D雲又靚😍影完就去下一個站了

小門地質公園

出發去第二站啦😆呢個站原來係最長，因為預左你極速睇完景點就極速食個飯再去個快既廁所，其實得個幾鐘做咁多野真係…😑

我、Ben同Lulu唔理三七廿一，跟住D人行去海邊既<鯨魚洞>，連個地質博物館都無入到😭我地去左涼亭到休息、聽海同聽歌，打發時間，之後就去廁所同搵野食了。

其實<鯨魚洞>係下面呢張相右面個舊石個個洞好似鯨魚咁喎😳

我地求其搵左間餐廳，叫左小管麵線，個麵一黎就要倒落去，不過係好食架，可惜唔夠時間細味😭

食完就跑返去上車去第三站了🙈

二崁聚落

坐一陣就到左<二崁聚落>，一個好古舊的閩南村落。香港叫古舊村落做圍村，台灣就叫古厝。以前D人好醒咁用當地搵到既石頭同珊瑚礁去起一間屋，跟住起左條村出黎。

而家聚落無咩人住，多數係賣特色手信、土產、小食咁…依舊好多遊客…

係村口見到呢個"中美合作"小朋友😆

行左陣影左陣相，又上返車，實在太曬了😎😎去第四站了

大菓葉玄武岩柱

第四站了😆終於去到我想去既景點<大菓葉玄武岩柱>！！😆😆😆成日見到D poster廣告都會見到玄武岩柱，簡直就係澎湖馬公代表咁滯，落左車之後要行上山去睇，好曬呀老老豆豆😎😎😎😎😎我曬到擔住把遮，我真係唔明Ben同Lulu點解可以頂得順呢種烈日當空😑😑😑我地跟住D人行上玄武岩柱了 終於上到啦😆人山人海😑仲有團專程黎影相😑咁唯有攝位影左幾張天空之鏡式既玄武岩柱…

之後我地玩野影左幾張自拍，係呢到我就唔post啦😆跟住又趕我地既行程了…(點解每個站得咁少時間😑😑😑)

西嶼西台

第五站，我地開始黎越近海邊了，黎緊3個站都同軍事有關😳

因為澎湖係外島，所以一個小島可以有好多軍事設備，包括仙人掌都係。

西嶼西台其實係砲台，明鄭清初已經興建好了，後來不停改建，加設備，直至民國年間先訂為古蹟。

司機哥哥照舊又係老遠停車場地方放低我地，我地自己行去古堡入口，點知售票處無人？！😳😳😳我地是誠實的孩子，係售票處到等職員返黎，費時佢俾人罰啦😂職員叔叔返到黎，見我地好乖咁等佢返黎，所以賣半票俾我地😝佢地D飛好正，可以用黎做明信片👍🏻😂

終於戰戰競競行入古蹟軍事堡壘，行入D隧道好黑好黑，靠僅餘太陽光黎照明。入面有好多個房，我估應該係監獄，或者放炸藥炮彈個D，感覺好陰森。每間黑房都有幾個小窗，應該敵人入侵個陣放枝鎗入去掃低敵人。

我地行上堡壘頂層，放左好多大砲係到😱當然全部都係古董，唔用得😂

漁翁島燈塔

第六站啦😎(真係好曬，曬到唔想落車) 呢站真係軍事禁區啦，燈塔既核心外圍有好多阿兵哥守住，仲要寫明除左燈塔範圍可以影相之外，其他範圍一律唔准影相。

燈塔核心內圍有辦公家同宿舍，外牆全部油哂白色，好有希臘feel 好彩個天萬里無雲晴空，同出面個海好襯😍

餌砲

第七站又係軍事景點，不過今次唔係真砲亦唔係軍事禁區，餌砲真係一座假．大砲！ 當年日軍係二次大戰期間（當時台灣本島同列島係由日本統治，唔屬於中國統治，所以台灣人要參軍就要入日本皇軍），起左一座假既大砲黎嚇盟軍。

成車人可能係之前既景點曬得太耐，一落車影左幾張相，5分鐘就跳返上車，要求司機快D去下一個景點😂🙈

通梁古榕

第八站，終於無咁曬啦，因為有好大好大既樹蔭。

係澎湖呢種又大風又貧瘠既土地上，有咁大棵榕樹生長實在唔容易。棵大榕樹生存左300幾年，D氣根不停生，越生越多越大，形成一個大既自然涼亭，樹下有石椅俾遊人坐低休息，大榕樹隔離有個保安宮，供奉左康府王爺。有廟有自然涼亭就可以變成一個好好既旅遊景點，賣當地小食既舖頭就越開越多，生意越做越多，真係"前人種樹，後人乘涼"。😬👍🏻

澎湖生活博物館

終於！終於！黎到最後一站，澎湖生活博物館(本身另加孔廟，但今日無開到)。但真係勁熱啦…個個一落車就狗衝去生活博物館售票處到買飛，可以第一時間入去嘆冷氣同去廁所(嘿)（老外BEN用9秒9既速度霸到個頭位XD）

呢個澎湖生活博物館就好似香港歷史博物館咁展示澎湖人以前大部分住係邊啦(馬公舊城區)，無柴搵咩生火啦(牛屎)，以前啲人點解曬到黑mung mung，著咩衫etc...終之又係唔夠時間行得哂啦-_-

其實台灣官方屬下既博物館真係好多野睇，收費又唔貴，D present 又做得好，我真係想行耐D架T_T

總結

成個媽宮。北環之旅終於玩哂，每個景點都好靚，不過每個站參觀時間真係唔太夠，真係唯一美中不足之處。 下篇會講夜晚去夜市食飯的~

#2016 #MZG #HKG #hongkong #magong #pengwu #june #taiwan #travel